Wednesday, November 7, 2018

4. ஊர்ப்பஞ்சாயத்து

"தலையாரிங்கறவர் ஊருக்குக் காவலா இருந்து, ஊர் ஜனங்க கட்டுப்பாட்டோட இருக்கும்படி பாத்துக்கணும் அவரே தப்புப்  பண்ணினா என்ன செய்யறது?" என்றார் மாணிக்கம்.

"அவரு தப்புப் பண்ணினாரா இல்லையான்னு தீர்மானிக்கத்தானே பஞ்சாயத்தைக் கூட்டியிருக்கோம்? விசாரிப்போம்" என்றார்  பஞ்சாயத்துத் தலைவர் கணேசன்.

"இந்த ஆளு என்னை அரிவாளை எடுத்து வெட்ட வந்தான் ஐயா" என்றார் மாணிக்கம் ஆவேசத்துடன்..

"என்னய்யா? அரிவாளால வெட்டப் போனியா?" என்றார் கணேசன்.

"வெட்டப்போகல ஐயா! ஆனா அரிவாளை  ஓங்கினேன்" என்றான் தலையாரி மாரிமுத்து.

"பாத்தீங்களா? அவனே ஒத்துக்கறான். முதல்ல அவனை இந்தப் பதவியிலேந்து தூக்குங்க" என்றார் மாணிக்கம் .

"இங்க பாருங்க மாணிக்கம். பஞ்சாயத்துதான் உத்தரவு போடணும். நீங்க  பஞ்சாயத்துக்கு உத்தரவு போடக்கூடாது" என்ற  கணேசன்," "சரி. இது நடந்தப்ப பாத்தவங்க யாராவது இருக்காங்களா?" என்றார்.

"என்னோட ஆளுங்க பத்து பேரு இருந்தாங்க. அவங்க இருக்கறப்பவே என்னை வெட்ட வந்தான் அவன். எவ்வளவு திமிரு இருக்கணும்?" என்றார் மாணிக்கம்.

"சரி. மாரிமுத்து, மாணிக்கம் ரெண்டு பேரும் தெருக்கோடியில் போய் நில்லுங்க. சாட்சிகளை விசாரிச்சுட்டு, உங்களைக் கூப்பிடறோம்" என்றார் கணேசன்.

"ஐயா! அவங்க பத்து பேரும் அவரோட ஆளுங்க. அவருக்கு சாதகமாத்தான் பேசுவாங்க" என்றான் மாரிமுத்து.

"அதுக்கு என்ன செய்யறது? பக்கத்தில இருந்து பாத்தவங்களைத்தானே சாட்சிக்கு கூப்பிட முடியும்? யாரு உண்மை பேசறாங்க, யாரு பொய் பேசறாங்கன்னு எங்களால கண்டுபிடிக்க முடியும்" என்றார் கணேசன்.

அரை மணி நேரம் கழித்து அவர்கள் இருவரையும் அழைத்து வரச்  சொன்னார்.கணேசன்.

"பத்து பேரையும் தனித்தனியா விசாரிச்சோம். அவங்க மாணிக்கத்தோட ஆளுங்கங்கறதால அவருக்கு சாதகமாத்தான் பேசினாங்க. ஆனா ஒவ்வொத்தர்கிட்டயும் தனித்தனியாப் பேசினதால என்ன நடந்ததுங்கறதை நாங்க தெளிவாய் புரிஞ்சுக்கிட்டோம்.

"ஊர்க்கண்மாயிலேந்து நேத்து ராத்திரி ஆளுங்களை வச்சு சின்ன கால்வாய் வெட்டி தன்  வயலுக்குத் தண்ணி பாய்ச்சி இருக்காரு மாணிக்கம். அப்ப ரோந்து வந்த தலையாரி மாரிமுத்து அதைப் பாத்துட்டு அதைத் தடுத்திருக்கான். மாணிக்கம் ஆளுங்க தாங்க வெட்டின இடத்தை மண் போட்டு மூடிட்டு  வீட்டுக்குப் போயிட்டாங்க.   

"இன்னிக்குக் காலையில, மாணிக்கம் தன் ஆட்களோட   மாரிமுத்துவைத் தேடித் போயிருக்காரு.  ஊர்ப்பஞ்சாயத்தில புகார் கொடுக்காதேன்னு அவன்கிட்ட சொல்லி இருக்காரு. ஆனா புகார் கொடுக்கப் போறதா மாரிமுத்து சொல்லி இருக்கான். மாணிக்கம் அவனுக்குப் பணம் கொடுத்துப்  பாத்திருக்காரு. அவன் அதற்கும் மசியலை. அதனால கோபப்பட்டு அவனை ரொம்ப மோசமாத் திட்டி இருக்காரு. தன் குடும்பத்தைப் பத்தி மாணிக்கம் தப்பாப்  பேசினதால மாரிமுத்துவுக்குக் கோபம் வந்து அரிவாளை ஓங்கி இருக்கான். இப்ப நாங்க என்ன செய்யணும்னு சொல்லுங்க."

யாரும் பதில் சொல்லவில்லை.

"இதில எனக்கு நாலு விஷயம் தெரியுது. முதல்ல மாரிமுத்து நியாயமா நடந்துக்கிட்டிருக்காரு. ரெண்டாவது, பணம் கொடுத்தப்ப வாங்காம இருந்து தான் நியாயத்துக்கு விரோதமா நடந்துக்க மாட்டேன்னு காட்டி இருக்காரு. மூணாவதா, தன்  குடும்பத்தைப் பத்தித் தப்பாப் பேசினதும் அவருக்குக் கோபம் வந்திருக்கு. மானம் உள்ள எந்த மனுஷனுக்கும் வரக்கூடியதுதான் இது. கடைசியா, மாணிக்கம் தன் ஆட்கள் பத்து பேரோட இருந்தப்பவும் தைரியமா அரிவாளை ஓங்கி இருக்காரு. ஒரு தலைவனுக்கு இருக்க வேண்டிய வீரம் அவர்கிட்ட இருக்கு. அதைப் பாராட்டணும். அவர் அரிவாளால வெட்டல. அரிவாளை ஓங்கினது அவரோட கோபத்தைக் காட்டத்தான். அதனால மாரிமுத்து தலையாரியா இருக்க எல்லாவிதத்திலேயும் தகுதி படைச்சவர்னு நாங்க நினைக்கறோம். கண்மாயிலேந்து கால்வாய் வெட்டித் தண்ணி இழுத்ததா மாணிக்கத்து மேல யாராவது புகார் கொடுத்தா அதைத் தனியா இன்னொரு நாளைக்கு விசாரிப்போம்" என்றார் கணேசன்

அரசியல் இயல் 
அதிகாரம் 39
இறைமாட்சி (அரசனின் பெருமை)
குறள் 384:
அறனிழுக்கா தல்லவை நீக்கி மறனிழுக்கா
மானம் உடைய தரசு.

பொருள்:
அறத்திலிருந்து வழுவாமல், அறம் அல்லாதவற்றை விலக்கி, வீரத்துடனும், மானத்துடனும் செயல்படுபவனே நல்ல அரசன்.

குறள் 385 (விரைவில்)

குறள் 383

Sunday, November 4, 2018

3. முன்னாள் முதல்வர்

"இவர் 'நாம்' பத்திரிகையிலேந்து வந்திருக்காரு" என்று என்னை அறிமுகப்படுத்தினார் ஆறுமுகத்தின் செயலர்.

"வாங்க" என்று என்னை வரவேற்ற ஆறுமுகம், "ஆறு மணிக்கே வந்துட்டீங்களே!" என்றார்.

"நீங்க சொன்னே நேரம்தானே!" என்றேன் நான்.

"என்னோட ஒரு நாள் முழுக்க இருந்து பாக்க வந்திருக்கீங்க. என் நாள் ஆறு மணிக்கே ஆரம்பிச்சுடும். அதனாலதான் ஆறு மணிக்கு வரச்  சொன்னேன். ஆனா உங்க பத்திரிகை வேலை ஒன்பது மணிக்கு மேலதானே?"

"இல்லை சார். இப்பல்லாம் எங்க வேலையும் 24 மணி நேரம்னு ஆயிடுச்சு" என்றேன் நான்.

"உங்க கட்டுரைக்கு 'ஆறுமுகம் - ஆறு முதல் ஆறு வரை'ன்னு தலைப்பு  வச்சுக்கலாம். ஆனா என் நாள் முடிய இரவு மணி பதினொண்ணு ஆயிடும்" என்றார் ஆறுமுகம்.

"உங்களுக்கு மறுப்பு இல்லேன்னா, நீங்க தூங்கப் போற வரை உங்களோட இருக்கேன்" என்றேன்.

"இருங்க. என் கனவிலே கூட இருந்து பாருங்க. அப்பத்தான் கனவில கூட நான் மக்களைப் பத்தித்தான் நினைச்சுக்கிட்டிருக்கேன்னு உங்களுக்குத் தெரியும்" என்றார் ஆறுமுகம் சிரித்தபடி.

ஆறுமுகம் எதிர்க்கட்சியின் தலைவர். அவர் ஆட்சியை இழந்து  ஒன்பது வருடங்கள் ஆகி விட்டன. ஆயினும் இந்த ஒன்பது ஆண்டுகளில் அவரைப் பற்றிய செய்தி இல்லாமல் ஒரு நாள் கூட பத்திரிகை வந்ததில்லை.

அடுத்த ஆண்டு நடக்கப்போகும் தேர்தலில் அவர் கட்சி பெரும் வெற்றி பெற்று அவர் மீண்டும் முதல்வர் ஆவார் என்ற எதிர்பார்ப்பு இருந்ததால் ஊடகங்கள் அவர் மீது இன்னும் அதிக வெளிச்சத்தைப் பாய்ச்சத் தொடங்கின.

எங்கள் பத்திரிகையில் 'முன்னாள் முதல்வருடன் ஒருநாள்' என்ற தலைப்பில் அவருடன் ஒருநாள் முழுவதும் இருந்து அவரைப் பற்றிய கட்டுரை வெளியிட முடிவு செய்தோம்.

ஆறுமுகம் தன் செயலரை அழைத்து  தன் அன்றைய பணிகளைப்  பற்றிக் கேட்டுக் கொண்டார். பிறகு அவரது பணிகள் சுறுசுறுப்பாகத் தொடங்கின. பிற்பகலில் ஒரு மணி நேரம் உறங்கியதைத் தவிர, தொடர்ந்து ஏதாவது செய்து கொண்டுதான் இருந்தார்.

அவர் சொன்னது போலவே அவர் பணிகள் முடிய இரவு மணி 11 ஆகி விட்டது.

நான் விடைபெறும்போது, "நீங்க என்ன எழுதப் போறீங்கன்னு தெரியாது. ஆனா, ஒருநாள் இருந்து பாத்ததில என்னைப்பத்தி என்ன நினைக்கறீங்கன்னு சுருக்கமா சொல்லுங்க. என் தூங்கும் நேரம் 10 நிமிஷம் தள்ளிப் போகும். பரவாயில்ல" என்றார் கைக்கடிகாரத்தைப் பார்த்தபடி.

"சார்! நீங்க முதல்வரா இருந்தப்ப உங்க செயல்பாடுகளை நான் கவனிச்சதில்ல. அப்ப நான் சின்னவன். ஆனா இன்னிக்கு நான் உங்களைப்  பாத்ததில, ஒரு நாட்டின் தலைவருக்குத் தேவையான ஒரு முக்கியமான குணம் உங்ககிட்ட இருக்கறதை கவனிச்சேன்."

"என்ன அது?"

"செய்ய வேண்டியவற்றை உடனே செய்யறது. இன்னிக்கு பல முறை உங்க நிகழ்ச்சி நிரலைத் தள்ளி வச்சுட்டு சில முக்கியமான வேலைகளை கவனிச்சீங்க. உதாரணமா, உங்களோட கூட்டணி வச்சுக்க விருப்பம் தெரிவிச்சு 'தமிழ் அரசு'க் கட்சி'யின்  தலைவர் விருப்பம் தெரிவிச்சதும் உடனே அவருக்கு போன் பண்ணி அவரை வரவழைச்சுப் பேசி அவரை கமிட் பண்ண வச்சீங்க. ஆளும் கட்சி கூட அவரைத் தங்கள் பக்கம் இழுக்க முயற்சி பண்றாங்கங்கற நிலையில உங்க உடனடி நடவடிக்கை உங்களுக்கு பலம் சேத்திருக்கு. இது மாதிரி இன்னும் சில விஷயங்கள்ள உடனே நீங்க செயல்பட்டதை நான் பாத்தேன். ஏன், இப்ப கூட, நான் எழுதப் போறதை என் கட்டுரை வந்தப்பறம் படிச்சுக்கலாம்னு நினைக்காம உங்க தூக்கத்தைத் தள்ளிப் போட்டுட்டு நான் என்ன நினைக்கிறேன்னு தெரிஞ்சுக்க விரும்பறீங்க. இதனால உங்களுக்கு எந்தப் பயனும் இருக்காதுன்னாலும், என் கருத்தைத் தெரிஞ்சுக்க விரும்பறீங்க."

"பயன் இருக்காதுன்னு சொல்லாதீங்க. நான் என்ன செய்யறேங்கறதை விட,  நான் செய்யறதை மத்தவங்க எப்படிப் பாக்கறாங்கங்கறதுதான் என் அரசியல் வெற்றியைத் தீர்மானிக்கும். உங்களை மாதிரி படிச்ச இளைஞர்களோட பார்வை எப்படின்னு தெரிஞ்சுக்கறதுல எனக்கு எப்பவுமே ஆர்வம் உண்டு."

"நீங்க இப்படிச் சொன்னதும் உங்களோட இன்னொரு குணத்தைக்  குறிப்பிடணும்னு  நினைக்கறேன். விஷயங்களைத் தெரிஞ்சுக்கற ஆர்வம். கல்லூரியில படிக்காட்டாலும் பொருளாதாரம், வெளியுறவுக் கொள்கை மாதிரி பல விஷயங்களைப் பத்தி நீங்க நுணுக்கமா கருத்து சொல்றதை நான் பல தடவை நான் கவனிச்சிருக்கேன். இன்னிக்கு ஒத்தர் வந்து  பொருளாதாரம், தொழில்நுட்பம், வெளிநாட்டு அரசியல் மாதிரி விஷயங்களைப் பத்தி ஒரு மணி நேரம்  உங்களுக்கு பிரீஃ பண்ணினாரு. நீங்க அவர்கிட்ட பல நுணுக்கமான கேள்விகளைக் கேட்டு தெளிவு படுத்திக்கிட்டீங்க."

"ஆமாம். வாரம் ஒருமுறை அவர் வருவார். அவர் நிறையப் படிக்கிறவர். பல வருஷமா நான் அவர் கிட்ட இந்த டியூஷன் எடுத்துக்கறேன்" என்று சிரித்தார்  ஆறுமுகம்.

"இன்னொரு விஷயம் நான் சொல்லியே ஆகணும். உங்க துணிவு பத்தி எல்லாருக்கும் தெரியும். இன்னிக்கு அதை நான் பாத்தேன். பிரதமர் சென்னைக்கு வரச்சே உங்க கட்சி கறுப்புக் கொடி காட்டும்னு அறிவிச்சிருந்தீங்க. அப்படிக் காட்டறவங்களை தேசிய பாதுகாப்பு சட்டத்தில் கைது செய்வோம்னு இன்னிக்கு முதல்வர் சொன்னாரு. அவர் அறிக்கை வந்து அஞ்சு நிமிஷத்துக்கெல்லாம் நீங்களே கறுப்புக் கொடிப் போராட்டத்துக்குத் தலைமை ஏற்கப் போவதா அறிவிச்சுட்டீங்க.  உங்க துணிவு உங்க கட்சித் தொண்டர்களுக்கு உத்வேகம் கொடுக்கும்."

"ரொம்ப நன்றி நண்பரே. உங்க கட்டுரையில என்னைப் பத்தின நெகட்டிவ் விஷயங்களும் வரும்னு நினைக்கறேன். அதை கட்டுரை வரும்போது படிச்சுக்கறேன்! காலம் தாழ்த்தாம செயல்பட வேண்டியதைப் பத்தி நீங்க சொன்னீங்க. என் தூக்கத்தையும் இன்னும் காலம் தாழ்த்தாம செய்ய விரும்பறேன். போயிட்டு வாங்க. மறுபடி சந்திப்போம். வாழ்த்துக்கள்" என்று எனக்கு விடை கொடுத்தார் ஆறுமுகம்.

அரசியல் இயல் 
அதிகாரம் 39
இறைமாட்சி (அரசனின் பெருமை)
குறள் 383:
தூங்காமை கல்வி துணிவுடைமை இம்மூன்றும்
நீங்கா நிலனான் பவர்க்கு

பொருள்:
காலம் தாழ்த்தாமை, கல்வியறிவு, துணிவு இந்த மூன்று குணங்களும் ஒரு நாட்டை ஆள்பவருக்கு எப்போதும் இருக்க வேண்டிய குணங்கள்.

Thursday, November 1, 2018

2. படையெடுப்பு

 "முல்லைவன நாட்டுக்குச் சென்ற நம் ஒற்றர்கள் என்ன செய்தி கொண்டு வந்திருக்கிறார்கள்?"என்றான் மன்னன் மணிவர்மன்.

"நல்ல செய்திதான் மன்னா. அவர்கள் படைபலம் நம்மில் பாதி அளவுக்கு கூட இருக்காது" என்றார் அமைச்சர்.

"அப்படியானால் போரில் அவர்களை வீழ்த்துவது சுலபம், இல்லையா?" என்றான் மகிழ்ச்சியுடன்.

"இருக்கலாம்" என்றார் அமைச்சர் தயக்கத்துடன்.

"என் தயங்குகிறீர்கள்? அண்டை நாட்டு அரசர் யாராவது அவர்கள் உதவிக்கு வருவார்களா?'

"அப்படியெல்லாம் இல்லை. தங்களைப் பகைத்துக் கொள்ளும் துணிவுள்ள அரசர்கள் யார் இருக்கிறார்கள்?"

"பின் ஏன் இந்தத் தயக்கம்?"

"முல்லைவன அரசன் சிங்கவர்மனுக்கு வேறு சில பலங்கள் இருப்பதாக நம் ஒற்றர்கள் கண்டறிந்திருக்கிறார்கள்."

"வேறு என்ன பலம்? புஜபலமா? நான் என்ன சிங்கவர்மனுடன் மல்யுத்தமா செய்யப் போகிறேன்?"

"இல்லை மன்னா. நான் சொல்வதைக் கொஞ்சம் பொறுமையுடன் கேட்டு, பிறகு ஒரு முடிவுக்கு வாருங்கள்."

"சொல்லுங்கள் அமைச்சரே! உங்கள் கருத்தை நான் எப்போதுமே மதிப்பவனாயிற்றே?"

"அவன் பலங்கள் என்று நான் குறிப்பிடுவது அவன் குணங்களை. முதலில் அவன் துணிவு. நம்மைச் சுற்றியுள்ள எல்லா மன்னர்களும் தங்களுக்கு அஞ்சி நம் நாட்டுக்கு கப்பம் கட்டி வருகிறார்கள். ஆனால் சிங்கவர்மன் மட்டும் நமக்கு அடிபணிய மறுத்து வருகிறான். படையெடுத்து வந்து அவன் நாட்டைப் பிடித்து விடுவோம் என்று நாம் எச்சரித்தபோதும் அவன் சற்றும் அஞ்சவில்லை.

"இரண்டாவது, அவனுடைய கொடைக்குணம். தான் அரண்மனையில் மிக எளிமையாக வாழ்ந்து கொண்டு, குடிமக்களுக்கு வாரி வழங்கி வருகிறான் அவன். தன் குடிமக்கள் யார் வீட்டிலாவது அடுப்பு எரியாவிட்டால் தன் அரண்மனையிலும் அடுப்பு எரியக்கூடாது என்று அவன் உத்தரவே போட்டிருக்கிறான். அதனால் அவன் குடிமக்கள் அவனை தெய்வமாக நினைத்து வணங்குகிறார்கள்.

"மூன்றாவது அவன் மிக அறிவுடையவன் என்பது பிரசித்தி பெற்ற விஷயம்."

"அந்த விஷயத்தில் நானும் அவனுக்குக் குறைந்தவன் இல்லை" என்று குறுக்கிட்டுச் சொன்னான் மணிவர்மன்.

"மன்னா.."

"ஆமாம். அமைச்சரே! எனக்கு அறிவு இருக்கிறதோ இல்லையோ, உங்களைப் போன்ற அறிவார்ந்த அமைச்சர்களின் ஆலோசனை எனக்கு அறிவாக அமைந்திருக்கிறதே" என்றான் மன்னன் சிரித்தபடி.

"மன்னரே! அடக்கத்தில் தங்களை மிஞ்சக்கூடிய மன்னர் இவ்வையகத்தில் இல்லை. பல நாடுகளைப் பணிய வைத்து சக்கரவர்த்தியாகத் திகழும் தாங்கள் என் போன்ற எளிய மனிதனின் பேச்சைக் காது கொடுத்துக் கேட்பதே என் பாக்கியம்" என்றார் அமைச்சர் உணர்ச்சிப் பெருக்குடன்.

"மேலே சொல்லுங்கள். இன்னும் எத்தனை குணங்கள் இருக்கின்றன சிங்கவர்மனுக்கு? அவை எப்படி அவனுக்குப் போரில் உதவப் போகின்றன?"

"நான்கு முக்கியமான குணங்களைத்தான் குறிப்பிட்ட விரும்பினேன். இந்த குணங்கள் இருப்பவரை வீழ்த்துவது கடினம் என்று அறிஞர்கள் சொல்லியிருக்கிறார்கள். தங்களிடமும் இந்த குணம் இருப்பதால்தான் தாங்கள் ஒரு சிறிய நாட்டுக்கு அரசராக இருந்தாலும் ஒரு பேரரசராக விளங்குகிறீர்கள்."

"என்னைப் புகழ்வது இருக்கட்டும். நான்காவது குணம் என்ன என்று இன்னும் நீங்கள் இன்னும் கூறவே இல்லையே"

"நான்காவது குணம் ஊக்கம் அல்லது விடாமுயற்சி. சிங்கவர்மன் சிறுவனாக இருந்தபோது அவன் தந்தை இறந்து விட்டார். அவனை நாடு கடத்தி விட்டு அவனுடைய உறவினர்கள் நாட்டை ஆண்டு கொண்டிருந்தனர். சிங்கவர்மன்  பெரியவன் ஆனதும் பலமுறை முயன்று தோற்றபின் அவர்களை வென்று ஆட்சியைப் பிடித்தான்."

"ஒரு மண்டபத்தை நான்கு வலிய தூண்கள் தாங்குவதுபோல் இந்த நான்கு குணங்களும் அவனைக் காக்கும். அதனால், சிங்கவர்மனின் படைபலம் குறைவாக இருந்தாலும்  அவனைத் தோற்கடிக்க முடியாது என்று சொல்ல வருகிறீர்கள். அப்படித்தானே?" என்றான் மணிவர்மன்.

"அரசே! தங்கள் அறிவுக்கூர்மை பற்றி நான் சொன்னது வெறும் புகழ்ச்சியல்ல என்பதை நீங்கள் நிரூபித்து விட்டீர்கள்."

"இல்லை அமைச்சரே. இனிமேல்தான் நிரூபிக்கப் போகிறேன். இத்தகைய அரிய குணங்கள் கொண்ட சிங்கவர்மன் ஆளும் நாட்டை நம் நட்பு நாடாக ஆக்கிக் கொள்ளப் போகிறேன்" என்றான் மணிவர்மன்.

அரசியல் இயல் 
அதிகாரம் 39
இறைமாட்சி (அரசனின் பெருமை)
குறள் 382:
அஞ்சாமை ஈகை அறிவூக்கம் இந்நான்கும்
எஞ்சாமை வேந்தர்க் கியல்பு.

பொருள்:
துணிவு, கொடைக்குணம்,சிந்தித்துச் செயல்படுதல், விடாமுயற்சி ஆகிய நான்கு குணங்கள் ஒரு அரசனுக்கு இயல்பாக இருக்க வேண்டியவை.

குறள் 383 (விரைவில்)

குறள் 381

Tuesday, October 30, 2018

1. இருவரில் ஒருவர்

"சி ஈ ஓ போஸ்டுக்கு ரெண்டு பேரை ஷார்ட்லிஸ்ட் பண்ணி இருக்கேன். அதைப்பத்தி உங்ககிட்ட கலந்து பேசணும்" என்றார் நிர்வாக இயக்குனர் சுந்தரேசன்.

"நீங்களே ஒத்தரை செலக்ட் பண்ணி இருக்கலாமே? எங்கிட்ட கலந்து பேச வேண்டியது அவசியம் இல்லையே?" என்றார் நிறுவனத் தலைவர் அகர்வால்.

"இல்லை. நம்ப கம்பெனியில இருக்கிற அஞ்சு டிவிஷன்ல, ரெண்டு டிவிஷனோட ஜெனெரல் மானேஜர்களை ஷார்ட்லிஸ்ட் பண்றது சுலபமா இருந்தது. ஆனா அவங்க ரெண்டு பேருக்குள்ள ஒத்தரை செலக்ட் பண்றது ரொம்ப கஷ்டமா இருந்தது. ரெண்டு பேரும் கம்பெனிக்கு நிறைய கன்ட்ரிபியூட் பண்ணியிருக்காங்க. நான் சில பராமீட்டர்ஸைப் பயன்படுத்தி ஒரு முடிவு எடுத்திருக்கேன். அதை உங்ககிட்ட டிஸ்கஸ் பண்றது நல்லதுன்னு நெனச்சேன். முதல்ல ரெண்டு பேரோட ப்ரோஃபைல் பாருங்க. சுருக்கமா எழுதியிருக்கேன்."

அகர்வால் இருவரைப் பற்றிய விவரங்களையும் விரைவாகப் படித்து முடித்தார். 

"நீங்க சொல்றது கரெக்ட்தான். ரெண்டு பேருமே சமமா இருக்கற மாதிரிதான் இருக்கு. நீங்க யாரை செலக்ட் பண்ணினீங்க? என்ன பாராமீட்டர்ஸைப் பயன்படுத்தினீங்க?"

"குமார் ரமேஷ் ரெண்டு பேருல குமாரோட டிவிஷன் கொஞ்சம் பெரிசு. லாபமும் அதிகம் வருது.  அதனால குமார்தான் இயல்பான சாய்ஸாத் தெரிவாரு. ஆனா ரெண்டு பேரும் எங்கிட்ட நேரடியா ரிப்போர்ட் பண்றதாலயும், அவங்களுக்குக் கீழே வேலை செய்யற பல எக்சிக்யூட்டிவ்ஸ் கிட்ட நான் அடிக்கடி பேசறதாலயும் எனக்கு சில விஷயங்கள் தெரியும்."

"அப்ப ரமேஷ்தான் உங்க சாய்ஸ்னு தெரியுது. சஸ்பென்ஸ் வைக்காம சொல்லிட்டீங்களே" என்றார் அகர்வால் சிரித்துக்கொண்டே.

"சஸ்பென்ஸ் இருக்கா இல்லையான்னு உங்களுக்கு நான் முழுசா  சொன்னப்பறம்தான் தெரியும்" என்றார் சுந்தரேசனும் சிரித்தபடியே. "ஆனா, சஸ்பென்ஸ் இருக்காங்கறதை விட நான் சொல்ற விஷயங்கள்ள  சப்ஸ்டன்ஸ் இருக்கான்னு நீங்க சொல்லணும்ங்கறதாலதான் உங்ககிட்ட என் அணுகுமுறையை விவரமா சொல்றேன்."

"சொல்லுங்க."

"நான் ஆறு பாராமீட்டர்ஸ் எடுத்துக்கிட்டேன். முதல்ல ரெண்டு பேரோட மார்க்கெட்டிங் டீமையும் ஒப்பிட்டுப் பாத்தேன். ஒரு நாட்டுக்கு ராணுவம் மாதிரிதான் ஒரு நிறுவனத்துக்கு மார்க்கெட்டிங் டீம். அதோட வலுதான் நிறுவனத்தோட வலிமையைத் தீர்மானிக்கும். குமாரோட மார்க்கெட்டிங் டீம் பெரிசு. அவங்களுக்கு வருமானம், இன்சென்ட்டிவ் எல்லாம் அதிகம். ஆனா ரமேஷோட மார்க்கெட்டிங் டீம் உற்சாகமா இருக்கற மாதிரி குமார் டீம் இல்ல. இத்தனைக்கும் ரமேஷோட டிவிஷன்லதான் மார்க்கெட்டிங் ரொம்ப கஷ்டம். ஆனா அவங்க எல்லாரும் உற்சாகமா வேலை செய்யறாங்க. இதுக்குக் காரணம் ரமேஷ் மார்க்கெட்டிங் டீம்ல இருக்கறவங்களோட அடிக்கடி பேசி அவங்க பிரச்னைகளைக் கேட்டு, அவங்களை உற்சாகப்படுத்தறது."

"இப்பவே குமாரோட விக்கட் போயிடுச்சே. சஸ்பென்ஸுக்கு வாய்ப்பே இல்லையே" என்றார் அகர்வால். 

"சப்ஸ்டன்ஸ் சார்! அது இருக்கான்னு பாருங்க. ரெண்டாவது விஷயம் ஊழியர்கள் மனநிலை. வெளிப்படையா, ரெண்டு டிவிஷன்லியுமே எல்லாரும் சந்தோஷமா இருக்கறமாதிரிதான் இருக்கு. ஆனா குமார் டிவிஷன்ல வேலையை விட்டுப் போறவங்களும், அதுக்கு பதிலா புதுசா சேரறவங்களும் அதிகம்."

"எம்ப்ளாயீ டர்னோவர்னு  சொன்னாலே எனக்குப் புரியும் சார். நானும் கொஞ்சம் படிச்சிருக்கேன்" என்றார் அகர்வால்.

"சார்! எனக்குத் தெரிஞ்சது எதுவும் உங்களுக்குத் தெரியாம இருக்காதுன்னு எனக்குத் தெரியும். ஜார்கன் எதுவும் பயன்படுத்த வேண்டாம்னுதான் அப்படிச் சொன்னேன்.  மூணாவது விஷயம் ஊழியர்களுக்கான வசதிகள். நாம ஒவ்வொரு டிவிஷனும் சுதந்திரமா பல விஷயங்களை முடிவு பண்ண விட்டிருக்கோம். ரமேஷோட டிவிஷன்ல லாபம் குறைவானாலும், ஊழியர்களுக்கு சலுகைகள் அதிகம் இருக்கு, காண்ட்டீன் சப்ஸிடி கூட குமார் டிவிஷனை விட அதிகம்"

"அதனாலதான் லாபம் குறைவா இருக்கோ என்னவோ!"

"இல்லை சார். இது ஊழியர்களோட உற்சாகம் சம்பந்தப்பட்ட விஷயம். குமார் சிலவகை ஊழியர்கள் முக்கியமானவங்கன்னு நினைச்சு செயல்படற மாதிரி அவங்களுக்கு அதிகச் சலுகை, மத்தவங்களுக்கு குறைந்த சலுகைங்கற கொள்கையைப் பின்பத்தற மாதிரி தெரியுது. உதாரணமா, அட்மினிஸ்ட்ரேஷன்ல இருக்கறவங்க ரொம்பப் புறக்கணிக்கப்பட்டவங்களா உணரறாங்க."

"நாலாவது, ஆலோசகர்கள். குமார் ஒரு சில சீனியர் எக்சிக்யூட்டிவ்களை மட்டும்தான்  கன்சல்ட் பண்றாரு. ரமேஷ் அப்படி இல்ல. அவர் எல்லாரோட யோசனைகளையும் காது கொடுத்துக் கேக்கறவரு. நல்ல யோசனை யார் சொன்னாலும் அதை பரிசீலனை பண்ற இயல்பு ரமேஷுக்கு உண்டு."

"இன்னும் என்ன சார் இருக்கு?"

"இன்னும் ரெண்டு இருக்கு. நீங்க எதிர்பாக்கற சஸ்பென்ஸும் இருக்கு! அஞ்சாவது விஷயம், காண்டாக்ட்ஸ். ரமேஷுக்கு பல நிறுவனங்களோட எக்ஸிக்யூடிவ்ஸோட நெருக்கம் இருக்கு. ஏதாவது பிரச்னைன்னா அவங்ககிட்ட உதவி கேக்க முடியும் ஒரு தடவை ரா மெடீரியல் ஷார்ட்டேஜ் ஏற்பட்டப்ப,  ரமேஷ் அவருக்குத் தெரிஞ்ச ஒரு நிறுவனத்திலேந்து அவசரத்துக்குக்  கொஞ்சம் சரக்கு வாங்கி வச்சுட்டாரு. எனக்குக் கூட இது அப்புறம் தான் தெரியும்."

"சரி. ஆறாவது."

"இது ரொம்ப முக்கியம்னு நினைக்கறேன். முன்னெச்சரிக்கை. ப்ரொடெக்  ஷன் எகைன்ஸ்ட் வல்னரபிலிட்டி.  ரமேஷ் கிட்ட இந்தப் பாதுகாப்பு உணர்வு இருக்கு. ஒருவேளை நம்ப ப்ராடக்டுக்கு டிமாண்ட் குறைஞ்சுட்டா, அல்லது வேற மாற்றுப் பொருள் வந்துட்டா, அதை எப்படி சமாளிக்கறதுங்கறதுக்காக ஒரு ரிஸர்ச் டிபார்ட்மெண்ட்டே வச்சிருக்காரு. லாபம் குறைய இதுவும் ஒரு காரணமா இருக்கலாம். ஆனா இது ஒரு இன்ஷ்யூரன்ஸ் மாதிரிதானே."

"ஆகக்கூடி ரமேஷ் உங்க ஆறு பாராமீட்டர்ஸ்லேயும் குமாரை மிஞ்சிட்டாரு. அதனால அவர்தான் அடுத்த சி ஈ ஓ. இதுதானே உங்க முடிவு?"

"என்னோட அணுகுமுறை சரியான்னு உங்ககிட்ட தெரிஞ்சுக்கணும்னுதான் உங்ககிட்ட இதை விவரமா சொன்னேன்."

"பிரில்லியண்ட். நீங்க எம் பி ஏ இல்லையே. இதையெல்லாம் எங்கே படிச்சீங்க? அது இருக்கட்டும். சஸ்பென்ஸ் இருக்கும்னீ ங்களே, அது என்ன?"

"நீங்க என்னோட அப்ரோச் தப்புன்னு சொல்லியிருந்தீங்கன்னா அதுதான் சஸ்பென்ஸா இருந்திருக்கும்!"

"இல்லை. வேற என்னவோ இருக்குன்னு நினைக்கறேன். நீங்க பின்பற்றின முறையை ஒரு புத்தகமா எழுதலாமே!"

"முடியாது சார்! ஏற்கெனவே ஒத்தர் எழுதிட்டாரு."

ஓ! இதுதான் சஸ்பென்ஸா? அமெரிக்கன் ஆதர்தானே?"

"இல்லை சார். இந்தியன் ஆதர்தான். அதுவும் ரெண்டாயிரம் வருஷம் முன்னாலேயே எழுதிட்டாரு - தமிழ்ல" என்றார் சுந்தரேசன்.

பொருட்பால் 
அரசியல் இயல் 
அதிகாரம் 39
இறைமாட்சி (அரசனின் பெருமை)

குறள் 381:
படைகுடி கூழ் அமைச்சு நட்பரண் ஆறும்
உடையான் அரசருள் ஏறு.

பொருள்:
படை, குடிமக்கள், அமைச்சர்கள், (குடிமக்களுக்கு) உணவு, பிற அரசர்களுடன் நட்பு, பாதுகாப்பு என்ற ஆறு அங்கங்களும் சிறப்பாக உள்ளவனே அரசர்களில் சிறந்தவன்.


குறள் 382 (விரைவில்)




4. ஊர்ப்பஞ்சாயத்து

"தலையாரிங்கறவர் ஊருக்குக் காவலா இருந்து, ஊர் ஜனங்க கட்டுப்பாட்டோட இருக்கும்படி பாத்துக்கணும் அவரே தப்புப்  பண்ணினா என்ன செய்யறது?&...