881. ஆதரவு கொடுத்தவர்

"நீ பொறந்த அஞ்சாறு மாசத்திலேயே, உன் அப்பா இந்த உலகத்தை விட்டுட்டுப் போயிட்டாரு. அப்ப உன் மாமா மட்டும் இல்லேன்னா, என்னால நிலைமையைச் சமாளிச்சு, உன்னை ஆளாக்கி இருக்கவே முடியாது" என்று கணபதியின் அம்மா சரசு, அவனிடம் அடிக்கடி சொல்லி இருக்கிறாள்.

அம்மா சொன்னதை ஏற்றுத் தன் மாமா பரஞ்சோதியிடம் நன்றியுடனும், விசுவாசத்துடனும் இருந்து வந்தான் கணபதி.

கணபதி படித்துப் பட்டம் வாங்கிய பின், சொந்தமாகத் தொழில் ஆரம்பித்தான்.

"உன் மாமாவை உன் கம்பெனியில வேலைக்குச் சேத்துக்கடா!" என்றாள் சரசு.

தன் மாமா ஏன் எந்த வேலைக்கும் செல்லவில்லை என்று முன்பே ஒருமுறை கணபதி சரசுவிடம் கேட்டபோது, தங்கள் சொத்துக்களைப் பார்த்துக் கொள்ள வேண்டி இருப்பதால்தான், பரஞ்சோதி வேலைக்குச் செல்லவில்லை என்று சரசு சொல்லி இருந்தாள்.

அம்மா சொன்னதால், தன் தொழில் நிறுவனத்தைப் பார்த்துக் கொள்ளும் மேலாளராகப் பரஞ்சோதியை நியமித்தான் கணபதி.

"அம்மா! மாமாவை வேலையை விட்டு நீக்கிட்டேன்!" என்றான் கணபதி, சரசுவிடம்.

"ஏண்டா? அவர் உன் கம்பெனியில் வேலை பாக்க ஆரம்பிச்சு ஆறு மாசம் கூட ஆகி இருக்காதே!" என்றாள் சரசு, அதிர்ச்சியுடன்.

"அவரை நான் வேலைக்கு வச்சதிலிருந்தே, அவர் பொய்க்கணக்கு எழுதி, கம்பெனி பணத்தைக் கையாடிக்கிட்டு இருந்திருக்காரு. என் கம்பெனியில வேலை செய்யறவங்க இதைப் பத்தி முன்னாடியே எங்கிட்ட சொன்னாங்க. இன்னிக்கு நானே அவரைக் கையும் களவுமாப் பிடிச்சுட்டேன். அதனால, அவரை வேலையை விட்டுப் போகச் சொல்லிட்டேன். அதோட, நம் குடும்பச் சொத்துக்களையெல்லாம் இனிமே அவர் பாத்துக்க வேண்டாம்னும் சொல்லிட்டேன்."

"ஏண்டா அப்படிச் சொன்ன? உங்கப்பா நம்மைத் தவிக்க விட்டுட்டுப் போனப்பறம், உன் மாமா மட்டும் இல்லைன்னா..."

"போதும்மா! இதை நான் ஆயிரம் தடவை கேட்டுட்டேன். அவர் நமக்குத் துணையா இருந்ததுக்கு அவர் மேல எனக்கு நன்றி இருக்கு. ஆனா, அவர் நம் சொத்துக்களைப் பாத்துக்கறேன்னு சொல்லிட்டு, நம் வருமானத்தில பெரும் பகுதியை எடுத்துக்கிட்டிருந்திருக்காரு. இதைப் பத்தி ஏற்கெனவே சில பேர் எங்கிட்ட சொன்னப்பவும், அவர் நமக்கு ஆதரவா இருந்திருக்கார்னுதான் பேசாம இருந்துட்டேன். இப்ப, அவர் பணம் கையாடற வரைக்கும் போனப்பறம், அவரோட உறவைத் துண்டிக்கறதைத் தவிர வேற வழியில்லை" என்றான் கணபதி.

"நிழல் கொடுத்த மரத்தை வெட்டக் கூடாதுடா!" என்றாள் சரசு.

"நாம மரத்தை வெட்டலேம்மா. அதோட நிழல்லேந்து விலகி வந்துட்டோம், அவ்வளவுதான். சில மரங்களோட நிழல்ல உக்காந்திருக்கறது உடம்புக்கு நல்லது இல்லேன்னு ஊர்ல சொல்லுவாங்க இல்ல? அது மாதிரி!" என்றான் கணபதி.

பொருட்பால்
நட்பியல்
அதிகாரம் 89
உட்பகை

குறள் 881:
நிழல்நீரும் இன்னாத இன்னா தமர்நீரும்
இன்னாவாம் இன்னா செயின்.

பொருள்: 

இன்பம் தரும் நிழலும், நீரும் நோய் செய்வனவாக இருந்தால், தீயனவே ஆகும். அதுபோலவே, சுற்றத்தாரின் தன்மைகளும் துன்பம் தருவானால், தீயனவே ஆகும்.

குறள் 882

குறள் 880

அறத்துப்பால்                                                           காமத்துப்பால்